'ఇంటింటా గ్రంధాలయం పథకం' విజయవంతం కావాలి

ఇంటింటా గ్రంధాలయం పథకం విజయవంతం కావాలని తెలుగుదేశం నాయకుడు నాదెండ్ల కిషోర్ కుమార్ ఆకాంక్షించారు. ఆదివారం (16-8-2015) బోనకల్ లో జరిగిన పల్లె ప్రపంచం ఫౌండేషన్ సమావేశంలో ఆయన ముఖ్య అతిధిగా పాల్గొని ప్రసంగించారు. మార్కెటింగ్ ద్వారా ఉపాధి కల్పిస్తూ ఇంటింటా గ్రంధాలయాలు ఉండేలా చేస్తున్న పల్లె ప్రపంచం కార్యక్రమం అభినందనీయమన్నారు.

పల్లె ప్రపంచం ఫౌండేషన్ తరపున మార్కెటింగ్ చేయడానికి గాను మరో నాలుగు కొత్త ప్రొడక్టులను ఆదివారం నాడు ప్రారంభించడం జరిగింది. రంగనాయకమ్మ రచించిన కమ్యూనిస్టు పార్టీ ఎలా ఉండకూడదు? పుస్తకాన్ని బోనకల్ జెడ్.పి.టి.సి బాణోతు కొండా ప్రారంభించగా లగడపాటి రామారావు కొనుగోలు చేశారు. రాజేష్ రాఖేడ్ మరియు గుర్రం కనకదుర్గ రచించిన 'చత్రపతి శివాజీ' పుస్తకాన్ని బి.జె.పి రాష్ట్ర నాయకుడు దొంతు జ్వాలా నరసింహారావు ప్రారంభించి కొనుగోలు చేశారు. టి.సాయి వశిష్ట రచించిన 'ఆదర్శ శాస్త్రవేత్త-భారతరత్న ఎ.పి.జె అబ్దుల్ కలాం' పుస్తకాన్ని లగడపాటి రామారావు ప్రారంభించగా చల్లగుండ్ల శ్రీనివాస రావు కొనుగోలు చేశారు. సంతూర్ 100 గ్రా. సబ్బుని రామన అప్పారావు ప్రారంభించగా బోయనపల్లి అంజయ్య కొనుగోలు చేశారు.

సంస్థ తరపున మార్కెటింగ్ చేసే పుస్తకాల ద్వారా ఇంటింటా గ్రంధాలయాలను ఏర్పాటు చేయడంతో పాటు ఆదాయం కూడా వచ్చేలా చేసినట్లు తద్వారా ప్రతి ఇంటిలో మంచి పుస్తకాలను ఉంచేలా ఏర్పాటు చేస్తున్నట్లు పల్లె ప్రపంచం ఫౌండేషన్ అధ్యక్షులు పల్లా కొండల రావు తెలిపారు. అన్ని రకాల పుస్తకాలను మార్కెటింగ్ చేస్తున్నట్లు తెలిపారు. ఎవరికి నచ్చిన పుస్తకాలు వారు కొనుగోలు చేయవచ్చన్నారు.

ఈ కార్యక్రమంలో సంస్థ అద్యక్ష కార్యదర్శులు పల్లా కొండల రావు, బోయనపల్లి అంజయ్యలతో పాటు నాదెండ్ల కిషోర్ కుమార్ , లగడపాటి రామారావు , చలమల అజెయ్ కుమార్ , రామన అప్పారావు, మండెపుడి శ్రీనివాస రావు, బ్రహ్మం, ఎల్.గురునాధం, చల్లగుండ్ల శ్రీనివాస రావులు ప్రసంగించారు.