యోగా హిందువులు మాత్రమే చేయాలా?

( image courtesy : google )

యోగా హిందువులు మాత్రమే చేయాలా?

గతంలో యోగాసనాలు శాస్త్రీయమా? అంటూ ఓ పోస్టు చూసి ఆశ్చర్యపడ్డాను. ప్రాణాయామం చాలా మేలు చేస్తుంది. ఇతర ఆసనాలవల్ల కూడా ఉపయోగాలున్నాయి. అయితే వీటి శాస్త్రీయతపై ఓ చోట చర్చ జరగడమూ చూశాను. మంతెన సత్యనారాయనరాజు గారు అయితే తేలికగా ఉండేలా సెలెక్టెడ్ ఆసనాలను వాటివల్ల కలిగే ప్రయోజనాలను ఆరోగ్యపరంగా శాస్త్రీయంగా వివరిస్తారు. ఆయన ప్రసంగాలు , వీడియోలు చూస్తే మనకా విషయం అవగతమవుతుంది. 

మన సనాతన ధర్మం, ఋషి సంస్కృతి లేదా సాంప్రదాయాలలో చాలా సైన్స్ దాగి ఉంది. మతాన్ని మితిమీరి విమర్శించడం లేదా అభ్యుదయం పేరుతో ప్రతీదానిని మూఢత్వంగా కొట్టి పారేయడమూ సరయినది కాదు. ఇపుడు యోగాని ఐక్యరాజ్య సమితి వారు గుర్తించారంటున్నారు. ఇటీవలి వరకు ఆక్యుపంచర్ కు కూడా గుర్తింపు లేదు. కొన్ని ముఖ్యమైన జబ్బులకు ఆక్యుపంచర్ ను గ్రీన్ తెరపీగా గుర్తిస్తున్నారు. చైనాలో ఆక్యుపంచర్ కు మoచి ప్రాధాన్యత ఉంది. ఇండియాలో ఆయుర్వేదాన్ని అటకెక్కిస్తున్నారు. చదువుకున్నవారు ఎన్ని సైడెఫెక్టులున్నా ఇంగ్లీషు వైద్యం పై అవసరానికి మించిన మోజుని పెంచుకుంటున్నారు.

ప్రతి వైద్య విధానమూ మంచిదే. వీటన్నికంటే జీవన విధానం ముఖ్యమైనది. జీవనవిధానాన్ని అలవాట్లు శాసిస్తాయి. అందుకే మంచి అలవాట్లను ఆచారాలుగా, సాంప్రదాయాలుగా పెట్టుకోవాలి. ఇప్పటికే ఉన్న సాంప్రదాయాలలో మంచివాటిని సైంటిఫిక్‌గా ప్రూవ్ కాగలిగిన వాటిని కొనసాగించాలి. ఆచరణలో నష్టం కలిగించని వాటిలో సైన్స్ ఇంకా కనిపెట్టలేకపోయినా వాటిలోని అంతరార్ధాన్ని వెలికితీసే పాజిటివ్ ప్రయత్నాలు చేయాలి.

అలాగే గతంలో ఏదైనా దేవుడి పేరుతో చెపితే వింటారని అనేక మంచి విషయాలను హిదూ మత ఆచారాలలో పొందుపరచారు. వీటిలో పరిశీలన, అనుభవం , సైన్స్ దాగి ఉందనడం అతిశయోక్తి కాదు. అనేక అలవాట్ల వెనుక ఉన్న సైన్స్ ని కేవలం అభ్యుదయం అనే మూఢత్వంతో వెక్కిరింపుగా, హేళనగా చూడడం అశాస్త్రీయమే అవుతుంది.

ఐన్‌స్టీన్ లాంటి గొప్ప సైంటిస్టే నేను చదువుకున్నవారి నుండి కొంత , చదువురాని వారి నుండి మరికొంత జ్ఞానం సంపాదించానని వినయంగా చెప్పాడని నా మిత్రుడొకరు చెప్పేవాడు. ఆచరణ ద్వారా ఫలితాలు రాబట్టిన అలవాట్లను, సాంప్రదాయాలను, సదాచారాలను హేళనగా చూడడం కంటే వాటిలో దాగి ఉన్న సైన్స్ ని వెలికి తీయడమే సమాజానికి అసలైన మేలు చేస్తుంది. మతం-దేవుడు వేరు కార్యాచరణలోని సదాచారాలు, సాంప్రదాయాలు వేరు. ఈ రెండింటినీ ఒకేలా చూడడం హ్రస్వదృష్టే కాగలదు.

ఏ మతం పేరుతో చెప్పినా అందులో కార్యాచరణకు మంచి ఉన్న ప్రతీ మంచిని స్వీకరించాలి. అలాగే హిందూ జీవన విధానంలో సైన్స్ నీ స్వీకరించాలి. అదే సందర్భంలో హిందూ జీవన విధానంలో మంచికీ , హిందూ మతమలోని చెడుకీ పొంతన పెట్టి చూడడమూ మంచిది కాదు. ఏ మతానికైనా ఇది వర్తిస్తుంది.

యోగా పేరుతో మత ప్రయోజనాలు పొందుదామనుకునే సంకుచిత ఆలోచనలవల్ల సమాజానికి నష్టం జరుగుతుంది కనుక ఇలాంటి అంశాలలోని సైన్స్‌ని అవి ఏ మతానివైనా సరే వెలికి తీసి అందరికీ పంచాల్సిన అవసరం ఉన్నది. ప్రక్రుతిలో ఉన్నదానినే సైన్స్ కనిపెట్టగలదు. ప్రక్రుతి సిద్ధమైన ధర్మాలతో పరిశీలనగా, ఫలితాత్మకంగా తయారైన మంచి సాంప్రదాయాలు ఏమి చెప్తున్నాయో పరిశీలించి వాటిలోని మంచిని నేటి తరానికి అందించాల్సిన బాధ్యత సైన్స్ పై ఉందంటే మీరేమంటారు?

- Palla Kondala Rao,

18-12-2014

*Republished

------------------------------------

మీరేమంటారు? శీర్షికలో ఏదైనా అంశాన్ని చర్చించాలనుకుంటే క్రింది మెయిల్ ఐ.డికి వివరాలు పంపగలరు.

janavijayam@gmail.com